دل میں نبی کی شمعِ محبت جلی رہے ظلمت کدے میں زیست کے تابندگی رہے

شمسِ ملت ٬ خلیفۂ حضور سرکار کلاں حضرت علامہ مفتی محمد شمس الضحیٰ شمسؔ بھاگل پوری علیہ الرحمہ کے عرس کے موقع پر منعقد " طرحی نعتیہ مشاعرہ " میں پیش کی گئی نعت پاک

◆ــــــــــــــــــــ۩۞۩ـــــــــــــــــــــ◆
(از قلم:- طفیل احمد مصباحی)

••────────••⊰۩۞۩⊱••───────••
دل میں نبی کی شمعِ محبت جلی رہے 
ظلمت کدے میں زیست کے تابندگی رہے

ابرِ بہارِ نعتِ پیمبر کی بوند سے 
گلزارِ فکر و فن میں سدا تازگی رہے

دنیا و آخرت کی بھلائی کے واسطے 
" پیشِ نظر ہمیشہ حیاتِ نبی رہے "

کھینچا گیا جو دار پہ عشقِ رسول میں 
 کیسے نہ قبر اس کی بھلا مخملی رہے

 یا رب مری دعا ہے کہ صحنِ حیات میں 
عشق و وفا کے چاند کی بس چاندنی رہے

 تعلیم دے رہی ہے حدیثِ رسولِ پاک 
انساں جہاں کہیں بھی رہے متّقی رہے

اے غازیانِ دین تمہاری زبان سے ! 
ناموسِ مصطفیٰ کی صدا گونجتی رہے

یا رب ترے حبیب کی مدحت کے غازے سے
تا عمر میری فکر کی دُلہن سجی رہے

 کرتا ہوں التجا یہی پروردگار سے 
 وقتِ اجل زبان پہ نعتِ نبی رہے

احمدؔ نبی کی " نعت نگاری " ہو مستقل 
صنفِ غزلؔ سے ربط ترا عارضی رہے