لوہے کا لبیک یا رسول ﷺ پہنا کیسا ہے؟

(سوال نمبر 4490)

لوہے کا لبیک یا رسول ﷺ  پہنا کیسا ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
السلام علیکم ورحمتہ اللہ وبرکاتہ
کیا فرماتے ہیں علمائے دین و مفتیان شرع متین مسئلہ ذیل کے بارے میں کہ لبیک یا رسول ﷺ جو لوہے کا ہوتا ہے اس کو پہنا کیسا ہے؟
 برائے کرم قرآن و حدیث کی روشنی میں جواب عنایت فرمائیں۔
سائل:- محمد طاہر اسلام رضوی انگر پور مرشد آباد بنگال انڈیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نحمده ونصلي علي رسوله الكريم 
وعلیکم السلام ورحمة الله وبركاته 
الجواب بعونه تعالي عز وجل 
مرد کے لیے لوہے یا پیتل یا کسی بھی دھات کا کڑا زنجیر پہننا ،ناجائز ہے اور اس کو پہن کر نماز ادا کرنا مکروہ تحریمی ہے یعنی اس حال میں نماز ادا کرنا گناہ ہے اور اگر کرلی ہو تواس کا اعادہ کرنا لازم ہے۔
(ایسا فتاوٰی اہل سنت میں ہے)
فتاوی رضویہ میں ہے 
مرد کے لیے ریشم کے کپڑے پہن کر نماز پڑھنے کا حکم مکروہ تحریمی بیان کرنے کے بعد ارشاد فرماتے ہیں بعینہٖ یہی حکم ان سب چیزوں کا ہے جن کا پہننا ناجائز ہے جیسے ریشمیں کمر بند یا مغرق ٹوپی یا وہ کپڑا جس پر ریشم یا چاندی یا سونے کے کام کاکوئی بیل بُوٹا چار انگل سے زیادہ عرض کا ہو یا ہاتھ خواہ پاؤں میں تانبے سونے چاندی پیتل لوہے کے چھلّے یاکان میں بالی یابُندا یا سونے خواہ تانبے پیتل لوہے کی انگوٹھی اگرچہ ایک تارکی ہو یا ساڑھے چار ماشہ چاندی یا کئی نگ کی انگوٹھی یاکئی انگوٹھیاں اگرچہ سب مل کر ایک ہی ماشہ کی ہوں کہ یہ سب چیزیں مردوں کو حرام و ناجائز ہیں اور ان سے نماز مکروہ تحریمی۔
(فتاویٰ رضویہ ج 7 ص 307،رضا فاؤنڈیشن لاھور)
بہارشریعت میں ہے
 اسی طرح مردوں کے لیے ایک سے زیادہ انگوٹھی پہننا یا چھلے پہننا بھی ناجائز ہے۔
(بہارشریعت ج 3،ص 428،مکتبۃ المدینہ کراچی)
فیضان سنت میں ہے 
سونے یا چاندی یا کسی بھی دھات کی ڈِبیہ میں تعویذ پہننا مرد کو جائز نہیں۔ اِسی طرح کسی بھی دھات کی زَنجیر خواہ اُس میں تعویذ ہو یا نہ ہو مرد کو پہننا ناجائز و گناہ ہے۔اِسی طرح سونے ، چاندی اور اسٹیل وغیرہ کسی بھی دھات کی تختی یا کڑا جس پرکچھ لکھا ہوا ہویا نہ لکھا ہوا ہو، اگر چہ اللہ کا مبارَک نام یا کلِمہ طیِّبہ وغیرہ کُھدائی کیا ہوا ہو اُس کاپہننا مرد کے لیے ناجائز ہے۔

(فیضان سنت، ص 70،مکتبۃ المدینہ کراچی)
والله ورسوله اعلم بالصواب

_________(❤️)_________ 

کتبہ :- فقیہ العصر حضرت علامہ مولانا مفتی محمد مجيب قادری صاحب قبلہ مدظلہ العالیٰ النورانی لهان ١٨خادم دارالافتاء البركاتي علماء فاونديشن شرعي سوال و جواب ضلع سرها نيبال
21/09/2023