جیز کیش یا ایذی کیش سے لون لینا کیسا ہے؟

 (سوال نمبر 4508)
جیز کیش یا ایذی کیش سے لون لینا کیسا ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
السلام و علیکم ورحمتہ اللہ وبرکاتہ
کیا فرماتے ہیں علمائے دین و مفتیان شرع متین مسئلہ ذیل کے بارے میں کہ 
کہ جاز کیش یا ایذی کیش سے جو بندہ پیسے وغیرہ لیتا ہے کیا یہ شرعی لحاظ سے ٹھیک ہے؟بندہ لیکر اس کے بعد اسے واپس کرتا ہے۔ جواب عنایت فرما دیں جزاک اللہ خیرا
سائل:- قاری محمد سفیان رضوی آزاد کشمیر انڈیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نحمده ونصلي علي رسوله الكريم 
وعلیکم السلام ورحمة الله وبركاته 
الجواب بعونه تعالي عز وجل 
اگر یہ کمپنی معینہ مدت کے لیے لون دے کر مع سود کے وصول کرتی ہے تو ایسی صورت میں ایسا لون لینا مسلمان کے لیے جائز نہ ہوگا۔
کہ سود دینا اور لینا دونوں حرام ہے ۔ 
حدیث پاک میں ہے 
حضرت عبداللہ بن مسعود رضی اللہ عنہ سے مروی ہے کہ اللہ کے رسول ﷺ نے سود کھانے والے، کھلانے والے، اسکی گواہی دینے والے اور اس کا معاملہ لکھنے والے سب پر لعنت فرمائی۔(سنن ابن ماجہ، کتاب التجارۃ، باب التغلیظ فی الربا، رقم الحدیث:2277، ج:2، ص:764، ط:داراحیاءالکتب العربیۃ)

البتہ بیلنس ختم ہونے کے بعد بعض موبائل کمپنیاں جو میسج بھیجتی ہیں اس سے معلوم ہوتا ہے کہ کمپنی جو ایڈوانس کی سہولت دیتی ہے اور اس پر تھوڑی بہت رقم کاٹتی ہے وہ سروس چارجز کی مد میں کاٹتی ہے یعنی ایڈوانس کی سہولت فراہم کرنے کا عوض ہے جو کہ جائز ہے اس لیے ایسی موبائل کمپنیوں سے ایڈوانس کی سہولت حاصل کرنا اور اس کے عوض کمپنی کا سروس چارجز زائد وصول کرنا جائزہے تاہم زیادہ بہتر اوراحتیاط اسی میں ہے کہ حتی الامکان ایڈوانس لون کی سہولت حاصل نہ کی جائے۔
فتاوی شامی میں ہے 
وشرعاً (تمليك نفع) مقصود من العين (بعوض) (فتاوی شامی 6/ 4)
والله ورسوله اعلم بالصواب

_________(❤️)_________ 

کتبہ :- فقیہ العصر حضرت علامہ مولانا مفتی محمد مجيب قادری صاحب قبلہ مدظلہ العالیٰ النورانی لهان ١٨خادم دارالافتاء البركاتي علماء فاونديشن شرعي سوال و جواب ضلع سرها نيبال
22/9/2023