سوال نمبر ١٥٤)
کیا کسی صحابہ سے غلطی ہوہی نہیں سکتی ؟
کیا ہم لوگ سینہ ٹھوک کر دعوےٰ سے یہ بھی نہیں کہہ سکتے کہ ہم مسلمان ہیں۔؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کیا فرماتے ہیں علمائے کرام مفتیان شرع متین مسئلہ ذیل کے متعلق کہ امام صاحب مسجد میں تقریر بولتے ہوئے کہتے ہیں سب سے غلطی ہو سکتی ہے کسی صحابہ سے غلطی ہوئی نہیں سکتی یہ جملہ قابل گرفت ہے کہ نہیں؟ ساتھ میں امام صاحب نے یہ بھی کہاکہ نبی کریم صلی اللہ علیہ وسلم نے صحابہ کا نام لے کر فرمایا تم جنتی ہو ان کا ایمان کتنا پکا تھا لیکن ہم لوگ سینہ ٹھوک کر دعوے سے یہ بہی نہیں کہہ سکتے کہ ہم مسلمان ہیں۔ قرآن و حدیث کی روشنی میں جواب عنایت فرمائیں۔
السائل:- محمد عباس رضا نوری گھر بلوا نگرپالیکا وارڈ نمبر 6 ضلع مہوتری نیپال
:-----------
نحمده ونشكره ونصلي على رسوله الأمين.
وعلیکم السلام ورحمتہ اللہ وبرکاتہ
الجواب بعونه تعالیٰ عز وجل
صورت مستفسره میں
امام صاحب کے دونوں جملے معتقدات اہلسنت کے خلاف ہیں۔ پہلا جملہ( کسی صحابہ سے غلطی ہوہی نہیں سکتی ) یہ جملہ بتا رہا ہے کہ صحابہ سے غلطی ناممکن ہے جبکہ ایسا نہیں ہے بلکہ معصوم عن الخطا ء فقط انبیاء و ملائکہ ہیں۔ دوسرا جملہ(ہم لوگ سینہ ٹھوک کر دعوے سے یہ بھی نہیں کہ سکتے کہ ہم مسلمان ہیں ) یہ جملہ بتا رہا ہے کہ ہمیں اپنے مسلمان ہونے میں شک ہے۔ شرح عقائد میں ہے کسی نے کہا۔ انا مؤمن ان شاء اللہ تعالیٰ۔ تو اگر شک کی بنا پر ہو تو کفر ہے اور اگر تبرک وغیرہ کی نیت سے ہو تو پھر بھی بہتر نہیں۔ غور کریں تو امام صاحب کے جملہ سے صراحتاً شک کا پہلو غالب ہے لہذا یہ جملہ کفریہ ہو رہا ہے جس سے توبہ ضروری ہے اور چونکہ التزام نہیں ہے لہذا قائل کی تکفیر نہیں ہوگی مگر توبہ ضروری ہے،
دونوں جملے چونکہ صریح ہیں لہذا تاویل کی گنجائش بھی نہیں ۔لہذا امام صاحب آئندہ جمعہ کے خطاب میں اپنے دونوں قول سے رجوع کریں اور آئندہ ایسے الفاظ سے لازماً اجتناب کریں
کیونکہ معصوم عن الخطا ء
فقط انبیاء و ملائکہ ہیں جمہور علماء اہل سنت کے نزدیک ۔
یاد رہے کہ بتقاضائے بشریت بعض صحابہ کرام سے غلطی سرزد ہوئی بھی ہے
جیساکہ کتب حدیث میں موجود ہے ۔
مگر اللہ تعالی نے صحابہ کرام کی خطاء اجتہادی وغیراجتہادی بھی معاف فرمادیا ہے جیساکہ ارشاد باری تعالی ہے
ولقدعفااللہ عنھم
(آل عمران) اور یقینا اللہ تعالی نے انہیں معاف فرمادیا ہے،
نیز اللہ جل شانہ نے فرمایا
ولقدعفاعنکم ( آل عمران)
اور یقینا اللہ تعالی نے تمہیں معاف فرمادیا ہے
اور سرکار دوعالم صلی اللہ علیہ وسلم کا فرمان
حضرت ابوھریرہ روایت کرتےہیں کہ سرکار صلی اللہ علیہ وسلم نے ارشاد فرمایا
لاتسبوا اصحابی، لاتسبوا اصحابی،فوالذی نفسی بیدہ لوان احدکم انفق مثل احدذھباماادرک مداحدھم ولانصفیہ:(صحیح مسلم)
میرے صحابی کی تنقیص نہ کرو میرے صحابہ کوبرا بھلا نہ کہو ،اس ذات کی قسم جس کےقبضئہ قدرت میں میری جان ہے اگر تم میں سےکوئی احد پہاڑ کے برابر سونا بھی خرچ کر کےایک مد(دوسے ڈھائی پاو)یااس کے نصف کے برابر نہیں ہوسکتا،
واضح ہواکہ صحابہ سےخطاءکاامکان ہےمگران کی تمام خطائیں اجتہادی وغیراجتہادی عنداللہ دونوں معاف ہیں اوران کامقام انبیاء کےبعد سب سے اعلی ہے۔اور تمام صحابہ کرام رضی رضی اللہ عنہم اجمعین جنتی ہیں ۔
اور الحمد للہ جب ہم مسلمان ہیں ۔ ہمارا نام اللہ تعالی نے مسلم رکھا ۔پس ہم سینہ ٹھوک کر کہیں کہ ہم مسلم ہیں جیسا کہ سورہ حج کی 78 آیت میں جو اصل بات بتائی گئی ہے
ھو سماکم المسلمین من قبل و فی ھذا۔۔۔
اس نے تمھارا نام مسلمان رکھا ہے پہلی اور اس کتاب میں۔۔۔
جیسا کہ کتب فقہ میں ہے
تنزيه الأنبياء - عليهم الصلاة والسلام: عن الخطأ أو الكذب في الرسالة:
أجمعت الأمة على أن الرسل والأنبياء معصومون عن الكذب والخيانة
(الموسوعة الفقهية الكويتية 8323/31949)
الملائكة معصومون من العصيان كما قال الله تعالى: {لا يعصون الله ما أمرهم۔(أفاق التيسير )
واللہ ورسولہ اعلم بالصواب۔
كتبہ:- حضرت علامہ مولانا مفتی محمد مجيب قادری صاحب قبلہ مدظلہ العالیٰ النورانی ،لہان ١٨،خادم البرقي دار الإفتاء سني شرعي بورڈ آف نیپال ۔
الجمعة ٩ أكتوبر ٢٠٢٠ء /٢٢صفر، ١٤٤٢ھ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مصدقين مفتيان عظام و علماء كرام، أركان سنی شرعی بورڈ آف نیپال ۔
(١) قاضی نیپال مفتی اعظم نیپال حضرت علامہ مفتی عثمان البرکاتی المصباحی صاحب قبلہ ۔
(٢) مفتی ابو العطر محمد
عبد السلام امجدی برکاتی صاحب ۔
(٣) مفتی محمد احمد رضا الثقافی صاحب ،
(٤) رئیس التحریر مولانا محمد شہاب الدین حنفی صاحب ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
زیر سرپرستی قاضی نیپال مفتی اعظم نیپال مفتی محمد عثمان برکاتی مصباحی صاحب قبلہ جنکپور ۔۔
المشتسہر، سنی شرعی بورڈ آف نیپال ۔۔۔۔۔۔
الجمعة ٩ أكتوبر ٢٠٢٠ء /٢٢صفر، ١٤٤٢ھ
