عصر کی چوتھی رکعت کے قیام میں سورہ فاتحہ کے بجائے تشہد پڑھا کیسا ہے؟

(سوال نمبر 4032)
عصر کی چوتھی رکعت کے قیام میں سورہ فاتحہ کے بجائے تشہد پڑھا کیسا ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
السلام علیکم و رحمۃ اللہ وبرکاتہ
کیا فرماتے ہیں علمائے کرام و مفتیان شرع متین مسئلہ ذیل کے بارے میں کہ زید نے بھول سے نماز عصر کی چوتھی رکعت کے قیام میں سورہ فاتحہ کے بجائے تشہد پڑھا یاد آنے پر سورۃ الفاتحہ پڑھ کر نماز مکمل کی اور آخر میں سجدہ سہو نہیں کیا اس سورت میں نماز ہوگی یا نہیں؟ قرآن و حدیث کی روشنی میں جواب عنایت فرمائیں عین نوازش ہوگی 
سائل:- محمد حنیف القادری نگلیا وی رامپور یوپی انڈیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نحمده و نصلي على رسوله الكريم 
وعليكم السلام ورحمة الله وبركاته 
الجواب بعونه تعالى عزوجل 
مذکورہ صورت میں سجدہ سہو کی ضرورت نہیں تھی پھر بھی نماز ہوگئی ۔
فرض نماز کی پہلی دوسری اور تیسری چوتھی میں تحیات پڑھنے کی دو صورتیں ہیں 
١/ اگر کسی نے فرض نماز کی پہلی رکعت میں سورۂ فاتحہ سے پہلے تشہد التحیات پڑھ لی تو چوں کہ وہ ثنا کا محل ہے اور التحیات میں بھی حمد وثنا ہے اس لیے اس صورت میں سجدہ سہو لازم نہیں ہوگا ہاں اگر سورۂ فاتحہ کے بعد  التحیات پڑھی تو سورت میں تاخیر یا رکوع میں تاخیر کی وجہ سے سجدہ سہو واجب ہوگا.
٢/ اور فرض کی آخری دو رکعتوں میں چوں کہ قراءت واجب نہیں ہے اس لیے ان دونوں رکعتوں میں بھی التحیات پڑھنے سے سجدہ سہو لازم نہیں ہوگا.
الفتاوى الهندية میں ہے 
'ولو قرأ التشهد في القيام إن كان في الركعة الأولى لا يلزمه شيء، وإن كان في الركعة الثانية اختلف المشايخ فيه، والصحيح أنه لا يجب، كذا في الظهيرية.
ولو تشهد في قيامه قبل قراءة الفاتحة فلا سهو عليه، وبعدها يلزمه سجود السهو، وهو الأصح؛ لأن بعد الفاتحة محل قراءة السورة، فإذا تشهد فيه فقد أخر الواجب، وقبلها محل الثناء، كذا في التبيين۔ ولو تشهد في الأخريين لا يلزمه السهو، كذا في محيط السرخسي'
(الفتاوى الهندية (1/ 127)
بہار شریعت میں ہے 
نماز فرض کی تیسری اور چوتھی رکعت میں افضل سورۂ فاتحہ پڑھنا ہے اور سبحان اﷲ کہنا بھی جائز ہے اور بقدر تین تسبیح کے چپکا کھڑا رہا، تو بھی نماز ہو جائے گی، مگر سکوت نہ چاہیے۔ (بہار شریعت ح ٣ ص ٥٣٥ مكتبة المدينة)
والله ورسوله اعلم بالصواب 

کتبہ :- حضرت علامہ مولانا مفتی محمد مجيب قادری صاحب قبلہ مدظلہ العالیٰ النورانی لہان 18خادم دار الافتاء البرکاتی علماء فاونڈیشن ضلع سرہا نیپال
13/07/2023