ویڈیو کال پر نماز جنازہ پڑھنا کیسا ہے؟

 (سوال نمبر 4862)
ویڈیو کال پر نماز جنازہ پڑھنا کیسا ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
السلامُ علیکم ورحمتہ اللہ وبرکاتہ
کیا فرماتے ہیں علمائے دین و مفتیان شرع متین مسئلہ ذیل کے بارے میں کہ کسی کا انتقال ہو گیا اور وہ میت دور ہے تو کیا اسی حالت میں ویڈیو کلنگ سے کوئی نماز جنازہ پڑھ سکتے ہیں ؟

جواب عنایت فرمائیں۔
سائل:- محمد تاج الدین متھرا یوپی انڈیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نحمده ونصلي علي رسوله الكريم
وعلیکم السلام ورحمة الله وبركاته
الجواب بعونه تعالي عز وجل
ویڈیو کال پر نماز جنازہ پڑھنا جائز نہیں ہے چونکہ غائبانہ نَمازِ جنازہ نہیں ہوسکتی میت کا سامنے ہونا ضروری ہے، امام میِّت کے سینے کے سامنے کھڑا ہونا مستحب ہے۔ چونکہ جنازہ کا موجود ہونا یعنی کُل یا اکثر یا نصف مع سر کے موجود ہونا ضروری ہے لہٰذا غائب کی نماز نہیں ہوسکتی۔ ہاں اپ ان شہیدوں کے لئے دعا کریں 
بہار شریعت میں ہے 
یعنی کُل یا اکثر یا نصف مع سر کے موجود ہونا، لہٰذا غائب کی نماز نہیں ہوسکتی۔ (بہار شریعت ح ٤ص ٤٣)

حاصل کلام یہ ہے کہ احناف اور مالکیہ کے نزدیک نمازِ جنازہ غائبانہ جائز نہیں امام شافعی اور امام احمد ابن حنبل رحمہما اللہ تعالیٰ کے نزدیک جائز ہے، حنفی و مالکی مسلک کی دلیل یہ ہے کہ حضرت نبی اکرم صلی اللہ تعالیٰ علیہ وسلم نے حضرت نجاشی شاہ حبشہ رضی اللہ عنہ کی نماز جنازہ پڑھی تھی وہاں درحقیقت تمام حجابات اٹھا دیئے گئے تھے اور آپ صلی اللہ تعالیٰ علیہ وسلم کے سامنے معجزہ کے طور پر نجاشی کا جنازہ کردیا گیا تھا تو ایسی صورت میں وہ غائبانہ نمازِ جنازہ نہ تھی
آپ صلی اللہ تعالیٰ علیہ وسلم کی حیاتِ طیبہ میں بے شمار واقعاتِ وفات پیش آئے بہت سے صحابہ کرام رضی اللہ عنہم کی شہادت ووفات کے واقعات ہوئے مگر ثابت نہیں کہ نماز جنازہ غائبانہ کا معمول اور عادتِ شریفہ رہی ہو خود نبی اکرم صلی اللہ تعالیٰ علیہ وسلم نے دنیا سے پردہ فرمایا تو حضراتِ صحابہ کرام رضی اللہ عنہم دور دراز علاقوں میں مقیم تھے مگر ثابت نہیں کہ انھوں نے آپ صلی اللہ تعالیٰ علیہ وسلم کی غائبانہ نماز جنازہ پڑھی ہو، خلفائے راشدین رضوان اللہ تعالیٰ علیہم اجمعین کے عہد مبارک میں بھی غائبانہ نماز جنازہ کا معمول کہیں منقول نہیں ملتا۔
 نماز جنازہ ایک دعا ہی ہے اپ فاتحہ خوانی کر لیں اور فاتحہ، مرحومین کے ایصال و ثواب کے لیے کی جانے والی دعا ہے، جو کہیں بھی، کسی وقت بھی، کسی طرح کی جاسکتی ہے۔ اس کے لیے فاتحہ پڑھنے والے کی قبر پر موجودگی لازم نہیں ہے۔ اسی طرح یہ بھی ضروری نہیں کہ قبر کی تصویر سامنے ہو۔ ہاں معلوم ہونا چاہئے کہ کس کے لیے فاتحہ پڑھی جانی ہے۔
والله ورسوله اعلم بالصواب

_________(❤️)_________ 

کتبہ :- فقیہ العصر حضرت علامہ مولانا مفتی محمد مجيب قادری صاحب قبلہ مدظلہ العالیٰ النورانی لهان ١٨خادم دارالافتاء البركاتي علماء فاونديشن شرعي سوال و جواب ضلع سرها نيبال
02/11/2023