آج دولھا بنا شاہ جیلان کا مرحبا مرحبا قلب شاداں ہے ہر اہلِ ایمان کا مرحبا مرحبا جاری دریا ہے آج اُن کے فیضان کا مرحبا مرحبا کاسہ پھیلا ہے منگتا و سلطان کا مرحبا مرحبا آج دامن بھرا ہے ہر انسان کا مرحبا مرحبا

منقبت حضور غوث اعظم رضی اللہ عنہ

♦•••••••••••••••••••••••••♦
آج دولھا بنا شاہ جیلان کا مرحبا مرحبا 
قلب شاداں ہے ہر اہلِ ایمان کا مرحبا مرحبا
جاری دریا ہے آج اُن کے فیضان کا مرحبا مرحبا
کاسہ پھیلا ہے منگتا و سلطان کا مرحبا مرحبا
آج دامن بھرا ہے ہر انسان کا مرحبا مرحبا

نور و نکہت میں ڈوبی ہوئی رات ہے واہ کیا بات ہے
پائی سب نے مسرت کی سوغات ہے واہ کیا بات ہے
اولیا کی چلی آج بارات ہے واہ کیا بات ہے 
آج نوشہ بنی وہ حسیں ذات ہے واہ کیا بات ہے 
 پھول ہے جو علی کے گلستان کا مرحبا مرحبا

غوثِ صمدانی محبوبِ یزدان ہے کیا عجب شان ہے 
سبطِ فخرِ بنی نوعِ انسان ہے کیا عجب شان ہے
گلِ باغِ علی شاہِ مردان ہے کیا عجب شان ہے
کشورِ اولیا کا وہ سلطان ہے کیا عجب شان ہے
سر جھکا اس کے آگے ہرانسان کا مرحبا مرحبا

نغمہءِ شانِ میراں جو پڑھنے لگا رنگ چڑھنے لگا
دل میں الفت کا نشّہ بھی بڑھنے لگا رنگ چڑھنے لگا 
رنج و غم کا ہر اک پتہ جھڑنے لگا رنگ چڑھنے لگا 
لشکرِ یاس کا پیر اکھڑنے لگا رنگ چڑھنے لگا 
ذکر ہےآج محبوبِ رحمان کا مرحبا مرحبا

مسند علم پر جلوہ گر ہوگئے معتبر ہوگئے 
مستند ہوگئے مقتدر ہوگئے معتبر ہوگئے 
مرجعِ صاحبانِ ہنر ہوگئے معتبر ہوگئے 
وہ جو صد رشکِ اہلِ نظر ہوگئے معتبر ہوگئے 
جوش پر دریا ہے ان کے عرفان کا مرحبا مرحبا

دل میں کچھ بھی نہیں آج رنج و الم ہے کرم ہی کرم
ہوگئے سارے دکھڑے مرے کالعدم ہے کرم ہی کرم
آج اشکِ مسرت سے ہے آنکھ نم ہے کرم ہی کرم 
چشمِ الطاف مجھ پر ہوئی لاجرَم ہے کرم ہی کرم
حال اچھا ہے مجھ سے پریشان کا مرحبا مرحبا

دل مرا ہر گھڑی اس پہ واری رہے فیض جاری رہے
کیف و سرشاری ہر وقت طاری رہے فیض جاری رہے
کچھ نہ دل میں مرے بے قراری رہے فیض جاری رہے 
یہ نواز اس کے در کا بھکاری رہے فیض جاری رہے
جس کو کہتے کو سب شاہ جیلان کا مرحبا مرحبا

_________(❤️)_________ 
از قلم:- حضرت علامہ مولانا نواز اعظمی گھوسی