جہاں بانی عطا کردیں بھری جنت ہبہ کردیں نبی مختارِ کل ہیں جس کو جو چاہیں عطا کردیں

کلام حضور تاج الشریعہ رحمۃ اللہ علیہ 

_________(❤️)_________
 جہاں بانی عطا کردیں بھری جنت ہبہ کردیں
نبی مختارِ کل ہیں جس کو جو چاہیں عطا کردیں

_________(⭐)_________
جہاں میں ان کی چلتی ہے وہ دم میں کیا سے کیا کردیں
زمیں کو آسماں کردیں ثریا کو ثریٰ کردیں

_________(🥀)_________
فضا میں اڑنے والے یوں نہ اترائیں ندا کردیں
وہ جب چاہیں جسے چاہیں اسے فرماں رَوا کردیں

_________(🌷)_________
مری مشکل کو یوں آساں مرے مشکل کشا کردیں
ہر اک موجِ بلا کو میرے مولیٰ ناخدا کردیں

_________(💛)_________
منور میری آنکھوں کو مرے شمس الضحیٰ کردیں
غموں کی دھوپ میں وہ سایۂ زلف دوتا کردیں

_________(❤️)_________
عطا ہو بے خودی مجھ کو خودی میری ہوا کردیں
مجھے یوں اپنی الفت میں مرے مولیٰ فنا کردیں

_________(🥀)_________
جہاں میں عام پیغام شہ احمد رضا کردیں
پلٹ کر پیچھے دیکھیں پھر سے تجدید وفا کردیں

_________(😍)_________
نبی سے ہو جو بیگانہ اسے دل سے جدا کردیں
پدر، مادر، برادر، مال و جاں ان پر فدا کردیں

_________(✨)_________
تبسم سے گماں گزرے شب تاریک پر دن کا 
ضیائِے رخ سے دیواروں کو روشن آئینہ کردیں

_________(💌)_________
کسی کو وہ ہنساتے ہیں کسی کو وہ رلاتے ہیں
وہ یونہی آزماتے ہیں وہ اب تو فیصلہ کردیں

_________(❣️)_________
گلِ طیبہ میں مل جائوں گُلوں میں مِل کے کِھل جائوں
حیاتِ جادوانی سے مجھے یوں آشنا کردیں

_________(🥀)_________
انہیں منظور ہے جب تک یہ دورِ آزمائش ہے
نہ چاہیں تو ابھی وہ ختم دورِ ابتلا کردیں

_________(💚)_________
سگ آوارۂ صحرا سے اُکتا سی گئی دنیا
بچائو اب زمانے کا سگانِ مصطفیٰ کردیں

_________(❤️)_________
زمانہ خوگر مے ہے نئی مے کی ضرورت ہے 
پلا کر اپنی نظروں سے وہ تجدید نشہ کردیں

_________(❤️)_________
مجھے کیا فکر ہو اختر مرے یاور ہیں وہ یاور
بلائوں کو جو میری خود گرفتارِ بلا کردیں
--------------------
ترمیم شدہ
تمنائے دلِ اشرف بس اتنی ہے سرِ کوثر
جب آقا جامِ کوثر دیں لبِ اقدس لگا کر دیں